1 Bispiras da tang Pista tang Pagta-lib tang Anghil. Gata-wanan ni Jesus ang kiminabot da tang oras ang magalin da tanandia ong kalibotan ang na agod magbalik da ong Tatay na ong langit. Impisa ong primiro ginegman nang pisan tang mga sinagpan na tarin ong kalibotan, ig mandian agpaita na ra mga monopag kabael tang pagmal na ong nira.
2 Ang labing asi, pamanapon da Jesus aroman na tang mga sinagpan na. Si Judas, ang ana ni Simon Iscariote, pinaisip dang lagi ni Satanas ang traidoron na si Jesus. 3 Mandian, gata-wanan ni Jesus ang sindol da ong nandia tang Dios ang Tatay tang tanan ang gaem. Ig gata-wanan na kang nagalin tanandia ong Dios ig ong Dios ka magbalik. 4 Animan asing pamanapon tanira, dayon ang kimendeng si Jesus, oman nagloat tang lambong nang panta-paw ig nangampit ta toalia ong awa na. 5 Nagtayon tanandia ta wi ong planggana, ig nagimpisang nagogat tang mga kakay tang mga sinagpan na. Kada maogatan na, agtrapoan na tang toaliang aggampiten na ong awa na.
6 Pagalenget ni Jesus ong ni Simon Pedro, ganing si Pedro, "Gino angay yawa ray magogat tang kakayo?"
7 Siminabat si Jesus, "India pa gaintindi mandian tang agboateno, piro maintindian mo ka enged pira pang kaldaw."
8 Ganing ong nandia si Pedro, "India ka enged papagogaten ta tang kakayo!" Piro ganing si Jesus, "Mga india magpaogat tang kakay mo ong yen, maliag yaning india enged ma-pen ong yen."
9 Animan ganing si Pedro, "Gino, mga maning atan, belag lamang tang kakayo tang ogatan mo, asta ra ka ang kalimao may ang kolo!"
10 Siminabat si Jesus, "Ang napandigo ra, limpio ra tang bilog ang sinangoni na, ig anda ray ang ogatan poira lamang ong kakay na. Limpio amo ra, piro belag ta yamong tanan." 11 Minaning si Jesus ang belag ta limpio tanirang tanan tenged gata-wanan na rang lagi mga sinopa tang magtraidor ong nandia.
12 Pagapagogat ni Jesus tang mga kakay nira, nagtok sing oman tang lambong na ig nagbalik ong lamisan. Ganing tanandia ong mga sinagpan na, "Onopa? Gaintindian mi mga onopay maliag yaning tang bindoatong na ong nindio? 13 Aggoyano nindio ta Maistro ig Gino, ig tama amo, tenged yo Maistro ig Gino mi ka kaman. 14 Mandian, mga yo, ang Maistro mi ig Gino, nagogat tang kakay mi, dapat mamagogat amo ka tang kakay tang kada tata may tata. 15 Binoato narin bilang alimbawa agod sia tang patoladan mi. 16 Agganingo ong nindio, anday torobolon ang mas alawig ong agalen na, ig anda kay sinobol ang alawig ong nanobol ong nandia. 17 Mandian gaintindian mi ra tang mga bagay ang na, animan mga boaten mi, masoirti amo.
Ang Bitala tang Dios (Ba-long Inigoan), WPS 2004
1 comment:
7 Siminabat si Jesus, "India pa gaintindi mandian tang agboateno, piro maintindian mo ka enged pira pang kaldaw."
Ganing tang maestra amen ong Psychiatric Nursing, ang tanan ang gaenabo ong kaboi ta may purpose. Si lang ka man, indi kang lagi mata-wanan ta pero komabot ka enged tang oras ang maintindian ta.
May nabasaw ang libro ang pagistorya natetenged ong mga taw ang mabagat mo ong langit. Pag napatay ita ra, ba-lo ita ono paning ong langit, may mabagat tang sari-saring taw, may mga kailala ta, ang doma estranghero, piro tanan tanira may koneksyon ong past life ta. Ipaintindi nira ong yaten tang mga natabo sing boi ita pa para masabat tang mga te-ma ta sing gaboi ita pa.
Indi kailangan mapatay pa para mata-wanan ta tang mga purpose ong mga bagay ang gatabo ong yaten. Teta ang mga sitwasyon ang kaisip ta maldisyon ong yaten, ang mga anday katapusan ang problema, belag pala. Don dapat itaen ta tang mabael ang pagmal tang Gino ong yaten. Ka kaman, mga abunda tang kaboi ta ig anday problema ta, maski mangudos andang pisan. Piro oras ang nagkaproblema ita, halos pa ulit-uliten ta tang Rosaryo.
Ang tanan ang gatabo ong kaboi ta, may plano tang Dios.
Keep moving forward!
Post a Comment