"Tabang, nagke-keb ami!"

istorya ni bucao

Ang napa-let ong ni Uncle Steve, dorwang mapopostora, makokodong ig alalawig ang mga babay. Da Ate Missy ni Ate Gail.

Asing molaw pa, namagbiyahe tanira ong Diit para mamisita. Pumpboat ni Ex-Mayor Edep tang tinayan nira katabid da Daisy Laab, Naida Edep, Ex-Mayor, may si Nong Rey Solis [ang asta napaning ta Manila indi ra nabalik ong Agutayan].

Doro kapalet tang timpo ang asi. Tenged indi pa guso tang cellphone nontokaw, anday medyos para matawanan tang gatabo ong kalalaodan. Labi ra si, may pamanolok ong enasan, nakibot ang may pa-goy ta tabang. Ganing, "Tabang, nagke-keb ami!" Si pala si Ate Gail and Ate Missy. Ang binoat nirang gabayan, container. Nangaboan tang mga aroman nira ong pump boat ang lolotaw-lotaw. Si Nong Rey kiminapay ka rin uno katabid da Ate Missy, kaso nagbalik ong pump boat.

Oman pagaramal ba-lo pinambalikan don ong may pinagke-keban nira. Ba-lo pa nangaolik ta banoa.

Na inistorya lang ong yen ta tatang tangay. Tenged molaw pa sing pagatabo. Kaiteg tang nem tang dorwang Americana diba? Ong pagtetengan da tang Diit may Agutaya si natabo pero nakaya ka nira ang kapayen pabalik ong banoa, ong labing buat.

May istorya ngani don ong yaten ang mga kana uno indi geldan ong mangalok, pero geldan tanira ong kiro.

Yawa, pagpareta ang may mangalok? Naita ra ta lalayog ang kosi? Naita ra ta tanggar? Ta pag-tumbling-tumbling ong kamalingetan? Tara, magistoryan ita..,