TALAKINEP TANG MOLANG AGUTAYNEN

AGUTAYA…

Banwa da nanayo, tatayo, lolo, lolao pati pepeyo
Ganing tanira tolong bukid ang telelepad
Indio yo masiguro tenged indi ka gaturungano
Asta initaw tang pruweba
Marka ong braso ni tatayo
Tolong bukid kaman ang tererepad
May sulat na pa ang Agutayan.

Ang mga mal ang ginikanano
Naturales ong banwang Agutaya
Ana ta mga manigkuma
Namaglayag alin dun ong isla
Asta naampir ong mabael ang banwa
Agud mapamanguma
Ig yading tinabungos tang mapa-bat nira.

Asing yo ay tatang molang ge-ley
Si tatayo, si nanayo pirmi ang gaba-yano
Kakanta kada damal-damal
Ang paning ong Cambian
Dun ono ong sirong tang lumboy
Tanira pamisik tang dublan.

Ang siste kang asya kada asi maba-yano
Todo tang paryawo tenged indio pinatabid malayn ong nemo
Isipo binuano ni nanayo ni tatayo
Mintras masabor tang lekeyo.

Maski yo ay nambael
Alawid ong Agutaya
Pinailala ni nanayo dun ang pagkabetang
Paboritong teraen maski asing nuntukaw
Lamayong binilan tagelan ta kadyos
Ang maski aneno palbugan ta mantika
Dayon ang paligidligidan tang batong kasin
Ekspres pa tang Agutayan.

Gatako ka tang bo-lok, maski indio gasamit
Pati mangga-pangga ang doro ono kasabor
Ki-yoy ta yaboyabo, silik, tamilok, latok
Asya pamangan ang pisang guyon ong tetenlano
Tebang may tengeg na
Kada damal damal sabor ang bitamina.

Agutayneno yo – tegat ang Agutaynen!
Alin ong maiteg ang pinagpalan ni Onsoy may Inggay
Animan muliko yo ong banwa ang ganingen
Sibayang langeb tetepeng ong balay
Itaeno lamang tang tolong bukid ang kanolnolan
Pati ang ganingeng lugar ta diwata ang magang alalan.

Kabuatan ni aing_panzkie.