Ang Manigpabaleng

Maski monoapa kasikat ang taw --

ganing tang doma

anda pay pandeg ong ka-sik

tang isio mo --

ang mga birtod mong narin,

indi ra bibilang para ong nio;

mimpisang pagpabaleng-baleng mo,

pinabayan mo tang niong sinangoni;

kaldaw may labi pagpaema ong ilineman,

pirmiang didildig --

mga papanawa ong dalan pagsigsaga;

pagpaimoda lamang

goyog-oyogang pana, pisanang papa-yod,

gintrimisena --

tanga totolmon ong nio, india mabatok,

mapoyata --

galiaga rang molik, india maeged,

pagatras abantia --

pagdilema pa ta golo, yawa ray kaitegan,

pangayata pa.

Mandian tambilogang sisimek-simek,

gisipen mo tang niong pagkabetang --

aglemeten mo tang kamalasan mo,

ang ganingen ang beer-gin;

kalespad mo, doroang kaniwang,

masitena ra --

galiliagang magpakonsolta ong doktor,

anday koarta --

pangelel da tang mga kalima mo,

kailoa ka --

india ra masarang ang magboyot,

ta maski baso --

bino-wanana ra tang mga barkada mo,

tambilogang pagpinitinsia --

anday domang gabo-wan pa ong nio,

tambilog ang basong

anday

teled na.

Ginotay-gotay

by Peregrina A. Rauto Llavan

Batok Baya

Tegka aypa tang guegmang ganingen mo?

Mga ang banuang pisan ang gambligan mo

Reges ang agkalawen ta mga karaho

Dayon ang disparatisen ong talunga mo mismo.

Ma-det ong puputokon, doro pungaw indi man isipen

Tenged yawa ang tribo don anda ra ay turobliyen

Ang mada-lang da-langa onopa pay importang balyeden

Ang pobreng sugod mo inurab da tang trampas ang manggaden

Mo-ya bato ong pamasi mo?

Yawing may balangay yawa pay lumu-bo

Agud lamang sintar ang mapamondo

Tang among mamo-log ong nio.

Indio! Mga yen ka lamang ang tata

Pangerengano ta melet kinuman ni mama

Kisihodang mamagbarangkawan ita

Basta gata-wananong tu-lid tang yen ang bandira.

Maski siguro ong nirang dumaduma

Ang kalawan ta pagkabetang malain ka

Aningen mang adi tang mando ta sia

Manakaw ta binedlayan, pandegdeg ig magpundar ta gira.

Ong maning tana ang pagkabetang

Yading trampas and anda ay pantang

Diplomasya ig titulo belag ta kaministiran

Isi ong isi, iteg tang pana-pawan

Mandian, kiminabot da tang tempo

Na ang matu-lid yaray gadihado

Ang bu-tot pagimong tu-lid

Samantalang ang matod asing bubulidbulid.

Mabuat man ig belag ta maningdon kaklaro

Narin lamang tang maliag ang ipakaboto

Pinundaran ig binedlayan ni pepeyo

Ginegman ig pinrotektarano

Indi kanay trampasen mo

Indi sia agpadisparates ong nio

Respetaren mong teritorio

Indi kamkamen ig angkenen mo

Mate-beka ong kaampo ampoano

Eldana ong Gino

May te-kana tang kalainan mo.

Indi ita padegdeg ong mga dayong pamagtrampas tang pagbetang ta.

Anday respetar nira ong gambligan tang pinundaran pa tang mga ginikanan tang ginikanan ta.

A-oy, Molika ra

A-oy, yadi onong natondi mo,
nagpakiloa pa tang tambalang.
Partiay ka tang bayad na,
gatoboko ra, mate-beka,
anday pamangano,
pama-dolpa-dolo ra lamang.

Pagpadamelo tang emeto,
basta lamang may i-bo.
Molika ra kay, A-oy,
itaben malobot tang initan mo.
Ang porta pirming abirto;
abrian mo tang kaldiro,
maski kalem anday itaen mo.

A Collection of Poems In Agutaynen, Filipino and English by
Peregrina A. Rauto Llavan
with illustrations by Joseph Z. Llavan

Anda ray litrato ang ma-post. May mms da ka rin tang Smart ong Agutayan, anda pa ka siguro ay matakong magpaekel obin belag pa ta activated. Mga may istorya mi atan, balitang Agutaynen, litrato, mga paimod, obin mga anunsio, ipaekel mi lamang on email add tatin, iheartagutaya@gmail.com.

Salamat. [bucao]

May tatang Maistra

May tatang maistra ong tokaw,
Ang ka-kawa-kawan ang nagpabo-kad tang isipo;
Tanandia tang agmalenong maistra ong primero grado.
Gata-wananong mepet da si Madam mandian,
Piro ong isipo ang gabo-wan ay ang itsora nang
Mola pang kasinlo-sinloan.
Konsoilong pa-dekan mga magolag ang paglibot,
Ang pagetel ta maloay tang kabala tang mga klasmitong
Mairingal, masiadong maraolag;
Kalalakan tang sinangoni naasta mga kakay,
Mga tata-lib kabanglo tang gabo-wan.

Indi ami naboay ang naintindi tang liksion,
Dorong kaklarong magbitala, madaling intindien.
Indi paginiteg, obin gasilag ang pario ta domang midio liyon;
Kaosay ang maistra, gileg ong yamen ang pagkayam.
Paginimod, pagtayaw, midio parario ami lamang,
Paborito amen tang mga istorya na.
Tata rang dailanang agmalen amen tanandia,
Gapoaw aming panalakinep,
Ang pagtay ami ong mga barko may iroplano,
Yading sina-liban amen-
Ang malala-bang ang talsi, mga bokid may patag,
Kinabot amen tang mga inadian may siodad.

Nagalin ong banoa tatang mapongaw ang kaldaw,
Gildaweno ra ka rin ong yadoang nanayo,
Ang isipo ponok ta masisinlong andemanano,
Asing molao pang maistrao pa si Madam.
Anda rang pisan ay gabalitano ong nandia;
Solo naming masisinlong andemanan,
May ang mo-yang kostombring pinaita na,
Ang mas pa ka mal ong tanan ang manggad;

Ang ipatoblio ka ong mga anao agod mangamalamad.

Nagalin ong: Ginotay-gotay

ni Peregrina A. Rauto Llavan

Ang librong na ni Mrs. Llavan ay may illustrations ni Joseph Z. Llavan

Banoao, Gademdemana Yen

Litrato nagalin ong ni khaled. Salamat ta yadi.

Agmalenong banoa...
banoa tang mga ginikanano,
anda ray logar ang magmas pa
ong nio, ang dorog kasinlo.

Asing pagatawo, yaway tokaw ang initao...
ang ka-kawan ang i-yako binasi mo,
pasalamatong dorong pagaitao ong nio,
doroa pala kayag, dorong kasinlo.

Asing lasteko pa pinasinsia mo
tang mga kamaio; sanglit molao,
ginegma nio, sinagod ta osto,
pinapano nio ong mga palad mo
ta masasabor ang kalanen
ang nagalin ong talsi may tanek mo.

Minaelong matandet, maderep;
ong tanan ang trabaho indio ginted,
mabaked tang dolio, palado madamel,
ena-enao mabaked ka, indio pangelel.

Manawao pa ang Mal ang Dios nailalao ra,
nga ang Dios ay gegma, palangga ita nandia,
animan palangga yen, may mga ginikanano,
gapil da tang yen ang masigkataw.

Animan, banoao, monopay pagalipato,
ang dogo atan nailat ong tanek mo,
dogong pirming gogoy ang magbaliko.
Baliedena yen ang pinagalinano,
agod makaboto ka ong palaningano.

Nagalin ong: Ginotay-gotay
ni Peregrina A. Rauto Llavan

Ayra Ta Tanira, Agutayan?

India rang pisan minebek-ibek,
asing bo-wanan tang mga boto mo
tang niong doyan.
Nalipatan da ngani nira
tang mga kantang
kinanta mo ong doyan;
ang mga tola may komposo
ang sinoldok pa da
Pepey may ni Papo.
Ayra ta tang mga ana mo Agutayan?
Bino-wanana ra.
Ayra ta tanirang initong-itong mo,
kineget-keget mo
on debdeb mong mabanglo?
Ayra ta tang mga ana mong
agtoboan mo ta mga pa-bat mo,
ang nagalin ong koma, bokid may talsi mo?
Anday balied-balied,
bino-wanana nira,
tenged getay-getay da
tang mga poyad mo.
Namagdilem ta kinao-yan
agod ipabogal mo.
Abaw, Agutayan!

from: Ginotay-gotay
A Collection of poems in Agutaynen, Filipino and English by
Peregrina A. Rauto Llavan
with illustrations by Joseph Llavan